— 263 —
itoe pakerdjahan, akoe koeatir satoe kali bisa menerbitken bahaja. Koen Ko akoe pikir maoe adjak, sedeng rahajat jang ada di sini, boleh pili sadja doea-tiga orang jang paling boleh dipertjaja boeat menemeni, dan jang laen soeroe sadja poelang ka masing-masing poenja doesoen, biar marika tjari pengidoepan jang halal."
„Kamoedian, kaloe akoe soeda sampe di Tenghoensan” kata poela ini orang moeda: „akoe nanti prenta orang bawaken oewang limaratoes tail perak goena kaoe meliwati hari sampe di hari — Ingetlah satoe pepata ada bilang: kaloe soeda dateng temponja tida maoe menjingkir, nistjaja bahaja dateng soeker terdjaga.”
Kang Tiong trima ini nasehat dengen soeka hati dan hatoerken trima kasi. Sigra djoega sakalian liauwlo dikasi taoe, jang marika boleh pada boebar, tjoema doea-tiga orang jang masi tinggal di sitoe bersama-sama Kang Tiong.
Itoe koeda Ngohoatjong jang djinak dikasi Lu Siotjia berdoea Ong Poh boeat toenggang, sedeng boeat gantinja itoe, Song An-peng toenggang koedanja Pek Tjiok-tong jang berboeloe koening.
Houw-jan Giok dan Tjhie Seng laloe toenggang masing masing poenja koeda, sedeng Koen Ko mengikoet dari blakang dengen djalan kaki.
Sasoedanja mengasi slamat tinggal, marika laloe toeroen goenoeng dengen teranter oleh Kang
