— 262 —
koeatir nanti membikin Tiatia djadi bersoesa hati. Maka akoe poenja pikiran, kaloe sasoedanja menganterken Song Koko, baeklah kita lantas berangkat djalan, boeat soesoel ajah ka Tenghoensan. Tjoema sadja, sekarang ada Lu Siotjia, bagimana kita haroes berboeat, soepaja itoe gadis tida terdjato kombali di tangannja pendjahat?”
„Bitjaramoe bener sekali,” kata Houw-jan Giok, jang sasoedanja berdiam sakoetika lama: „dari hal Lu Siotjia baek kita kirim sadja di doesoen Song-ketjhoen boeat samantara waktoe sampe familienja dateng tjari. Song Koko djoega tentoe tida kaberatan, boekan?”
„Oh, tentoe!” saoet Song An-peng:„lebihan djoega akoe ada sadia boeat membri toeloengan.”
Kamoedian Houw-jan Giok prenta orang panggil Lu Siotjia bersama Ong Poh, pada siapa laloe dikasi taoe maksoednja. Lu Siotjia menjataken soekoer, sedeng itoe nene toea berdjandji soeka boeat mengikoet dan mendjaga dirinja itoe gadis boeat salama-lamanja.
„Itoe baek,” kata Tjhie Seng.
Houw-jan Giok barpaling pada Kang Tiong dan berkata:
„Akoe liat oesiamoe sekarang soeda boekan moeka lagi. Maka boeat mendjaga diri, baeklah kaoe oeroes sadja ini gredja, sedeng itoe waroeng arak boleh ditoetoep sadja, sebab dengen melakoeken
