— 52 —
Achir-achir ia ambil poetoesan boeat pergi kaloear aken menjoesoel itoe iboe, jang tida kataoean kamana djalannja. Tapi sabelonnja ia angkat kaki, dari loear ada kaliatan saorang melangkahi pintoe mertindak masoek.
Orang itoe berbadan tegap, tingginja lebi-lebi dari delapan kaki. Koelit moekanja ada poeti bersi, sapasang matanja jang tjeli ada tertawoeng dengen alis jang itam dan kereng, hingga roepanja djadi tjakep sekali.
Njatalah ia ini ada satoe hohan jang gaga perkasa. Oesianja didoega kira-kira tigapoeloe taon. la tida memake kopia, hanja pelangi soetra jang hewarna idjo moeda, jaitoe pakeannja djago-djago di itoe djaman.
Ini orang masoek ka dalem itoe gredja dengen tindakan tetep, potongannja jang sigep, ada membri kanjatahan bahoewa ia ada saorang paperangan, atawa sedikitnja di Kangouw poenja orang gaga.
Siauw-tjhit jang memang lagi kabingoengan dan mara-mara lantaran iboenja dibawa orang, satelah meliat itoe orang jang baroe dateng, dengen zonder menanja lagi ia lantas berlompat menghamperi sambil bertreak, kamoedian pegang orang poenja tangan dengen lakoe mengantjem, seperti djoega saorang jang baroe dapet tangkep satoe maling.
