— 46 —
temboknja soeda banjak jang goegoer, keadahannja amat kotor dan patoengnja poen soeda deboeh dowangan.
Di dalem gredja itoe ada banjak galagasi dan kabang-kabang, sedeng sapotong perabot tida ada kaliatan di itoe roewangan. Sebla daon pintoenja soeda terpental dari engselnja, maka ini daon pintoe disapoe bikin bersi, boeat djadi tempatnja itoe orang toea berbaring.
Kamoedian Siauw-tjhit boeroe-boeroe balik lagi katempat jang tadi boeat ambil boengkoesannja bersama koeda jang ditinggal. Dan sekarang baroe ia dapet liat jang pemandangan di ini goenoeng ada amat angker dan menakoeti.
Bermoela ia kira di ini tempat tida ada orang jang tinggal. Tapi waktoe balik kombali, dari kadjaoean ada kaliatan mengeboel asep, soeatoe tanda jang di tepi itoe boekit ada roema orang.
Sambil taro itoe boengkoesan Siauw-tjhit lantas kaloearken satoe selimoet boeat toetoepi badan iboenja, kamoedian ia soeroe orang toea ini tidoer, soepaja bisa kaloear kringet dan enakan.
,,Tapi leherkoe aoes sekali, anak," kata iboenja dengen soeara merinti.
,,Kaoe tida boleh minoem aer dingin, iboe," kata Siauw-tjhit dengen hati kasian: ,,kaloe aoes, baek minoem aer mateng sadja dan akoe nanti tjari api boeat masak aer dan sedoeh thee.—Sebab
