— 44 —
Selang tiga hari dari itoe kadjadian, dengen mengadjak brapa poeloe orang militair dari kota Tjetjioe, Thio Kan-poan pergi ka itoe doesoen boeat bikin penangkepan menggeroepoek, sebab dengen beterang dikoeatir soesa katangkep.
Tapi tida taoenja itoe Oah Giam Lo ada banjak mempoenjai kawan dan mata-mata, maka waktoe soldadoe politie dateng, kawannja lantas kasi taoe dan di sitoe lantas dilakoeken pertempoeran heibat, dimana salaenja ada bebrapa belas soldadoe jang binasa, Thio Thaijsioe djoega toeroet melinjapken njawa.
Sekarang, oleh pamerenta agueng soeda dikaloearken prenta boeat tangkep itoe Oah Giam Lo jang merat, dan disiarken djoega gambarnja di tempat-tempat jang rame, soepaja orang bisa kenalin dan tangkep padanja.
Pada orang-orang jang bisa menangkep itoe brandal, tentoe dapet persenan besar.
Demikianlah itoe tjerita.
,,Oh, oh, kaloe begitoe akoe lagi sedeng ditjari keras," kata Siauw-tjhit jang sasoedanja mendenger itoe tjerita, sembari hamperi kombali pada iboenja jang lagi menoenggoe. Tapi pada ini orang toea ia tida kasi taoe soeatoe apa, sebab koeatir sang iboe nanti jadi bertamba kesel.
Sebab koeatir bener-bener ada orang jang kenalin padanja, maka dari itoe doesoen ia lantas
