— 28 —
satenga mati. Mana jang belon dapet loeka lantas melariken diri, sedeng jang soeda mengglepak, dengen merangkang lantas tjari gagombolan boeat selesepin diri, soepaja dirinja tida djadi binasa di tangannja itoe Oah Giam Lo, jang bermoela ia tida sekali kira, ada mempoenjai tenaga begitoe besar.
Pada sala satoe oppas jang soeda kapoekoel kapalanja dan badannja penoeh dengen loeka-loeka, Siauw-tjhit laloe hamperi, dengen maksoed boeat indjek lagi satoe kali batang lehernja. Tapi satelah denger itoe orang meratap minta-minta ampoen, soepaja djiwanja tida dibinasain, Siauw-tjhit lantas membentak:
,,Kaloe kaoe begitoe takoet mati, mengapatah kaoe begitoe koerang adjar brani dateng ka mari aken maen gila padakoe?"
,,Itoelah bockan salanja kita-orang, djawab itoe oppas dengen soeara merinti: sebab kita-orang diadjak, manatah boleh tida menogroet. Dan akoe harep hohan poenja moera hati aken mengasi ampoen."
,,Baek, akoe nanti kasi ampoen padamoe," djawab Siauw-tjhit sambil oeroengken niatnja boeat toeroen tangan lagi: tapi kaoe moesti mengakoe teroes terang dan kasi taoe apa jang sabenernja. Bila ada sadja satoe perkatahan jang tida betoel, — hati-hatilah djiwamoe!"
