— 124 —
bisan boeat ia lakoeken sagala kadjahatanja jang paling achir."
,,Kita-orang moesti berlakoe dengen hati-hati," kata Khouw Thaij-so: ,,soepaja apa jang hendak dilakoeken tida mendjadi gagal. Sebab kaloe ini sekali ia bisa lari, tentoe lebi soesa boeat kita basmi padanja."
,,Thaij-so troesa djadi koeatir," kata Tjo Loen: ,,masalah satoe tida bisa tjekoek batang lehernja. Salaennja kita berlima, djoega akoe ada membawa sapoeloe rahajat boeat membantoe."
,,Begitoe, bagoes!" kata itoe njonja roema: ,,sabagimana pribahasa ada bilang: kaloe maoe tjaboet roempoet moesti sama akar-akarnja. Nah begitoe djoega dengen ini kali poenja pakerdjahan kita moesti basmi djahanam dengen tida kasi ampoen lagi pada satoe orang, basmi sama sekali apa jang ada."
Begitoelah iaorang makan minoem sembari bitjara-bitjara sampe ampir tengamalem baroe brenti.
Sasoedanja medja perdjamoean ditoetoep, itoe ampat orang gaga laloe bersiap, jang ditoeroet djoega oleh Khouw Thaij-so, djadi berlima.
Masing-masing ada bawa sendjata jang lengkap, dan dengen pakean menjamar marika laloe kaloear dari waroeng Sipliepahij, bersama itoe sapoeloe pengikoet jang baroe abisan santap di medja loear.
