— 242 —
kioe, lekas toh sekarang kita pergi kaloear temenin dia nonton. Samentar tentoe ia nanti tjari'in sama loe. Kliwat gila tinggal di sini sadja, sedengan ini malem ada malem pengabisan. Besok soeda soeda kaga ada lagi tjapgoh-meh."
„Gi da ko Hoei-djin djalan doeloean; samentar lagi djoega saia nanti kaloear," kata Bong-loan dengen soeara koerang njata.
Sakali ini djedjaka itoe lantas mengarti apa maksoednja itoe bitjara. Sasoeda berdiam sabentaran, laloe ia berkata:
„Pergi da loe kaloear. Djalan sadja dari roemah goea, sebab di depan ada sesak sekali sama orang jang nonton.”
Bong-loan tida toenggoe sampe disoeroe doewa kali. Sasoeda rapetin pintoe dari roemahnja, lantas ia pergi ka roemahnja Hoei-djin dengen ambil djalan dari blakang, hingga tinggal djedjaka kita sendirian dalem itoe kebon jang amat soenji, kerna nataran itoe poen salaennja ada terkoeroeng dengen tembok tinggi, malaenken ada berwatasan dengen kampoengnja orang Boemipoetra, jang koetika itoe rata-rata pada menonton karamean.
Hoei-djin berdjalan di antara pot-pot kembang. Pikirannja di itoe waktoe haroeslah dibilang ada menjelit di tengah-tengahnja senang dan doekah, — boekan doekah jang sering membikin otak manoesia djadi panas seperti api, tapi adalah itoe sa-
