— 238 —
„Poekoel engga, tapi engga karoean-roean ia ngoembras-ngambroes sadja, memaki engga brentinja."
„Loe kanapa mangka dia boleh djadi begitoe?"
„Engga apa-apa."
„Kaloe engga apa-apa, masa ja ia boleh djadi memaki engga karoean-roean!“
„Taoehlah entjim. memang adatnja begitoe."
„Ja, goea djoega engga habis mengarti, kanapa loe poenja entjim sampe begitoe bengis sama loe. Kapan kaloe dia dateng ka roemah goea diliatnja ada baek betoel. Ia soeka godahin sama si Sioe-kioe, habis sampe si Sioe-kioe tioebit-tjoebitin sama dia, engga dia djadi mara. Goea si memang salamanja soeda bentji sadja sama dia, pengrasahan kaloe dia tanja, goea engga kapinginan saoetin. Kaloe dia brani bengis-bengis sama goea, masa oeroengan goea engga lawan, tapi engga, dia salamanja ngomong baek-baek."
„Entjim djadi orang memang begitoe. . . ."
Bong-loan tida teroesken lebi djaoe ia poenja bitjara, Ia toendoekin kapalanja dan gosok-gosok ia poenja kaki di djoebin.
Sasoeda menoenggoeken samantara waktoe dengen siasia, Hoei-djin laloe menanja dengen soeara bersarikat :
„Bagimana?"
„Bong-loan kaliatannja ada sangsi-sangsi, dan laloe ia berkata:
