XIII.
DALEM KALANGAN FAMILIE BAROE.
Setelah Ali pacha dateng di gedongnja, iabteroes masoek ka kamar dalem, di mana ia poenja istri ada doedoek menangis, sebab baroe keilangan satoe soedara jang amat ditjinta.
Hanoem Emineh, istrinja Ali pacha, baroe liwat sapoeloe taon berlaloe dari negrinja di Albanie; ia telah menika pada Ali pacha jang di itoe masa ada djadi gouverneur dari Janina. Parasnja Emineh ada eilok serta tjantik, oemoernja baroe tiga poeloe taon; potongan moekanja ada sebagi prempoean Albanie, matanja biroe, ramboetnja item, di bla doea, terlepas di blakang. Badjoenja ada dari kaen mouselien Persie, di kapalanja ia pake satoe fez ketjil, samentara di keeping dan djari-djari tangannja ada bertjahja barang-barang permata moelia. Ini njonja bangsawan ada doedoek bersila deket djendela, di hadepannja ada satoe medja ketjil, di mana ada ditaro satoe hoka (pipa) jang lagi dipasang oedjoengnja dan lagi ada bebrapa djeroek, satoe tempat kopi dan tiga îjawan ketjil. Pada kakinja ini njonja ada doedoek satoe boedak prempoean bangsa Nubie jang memboedjoek njonjanja dengen berbagi bagi perkata'an manis boeat mengiboer.
Ali pacha masoek ka dalem dengen roepa senang dan doedoek di sebla istrinja jang prenta boediang aken pasang lampoe besar.
