VII.
BINTANG JANG MOELAIN BERSINAR.
Ali pacha, minister van buitenlandsche zaken di Toerki, ada kira-kira lima poeloe taon oemoernja, badannja tinggi besar, roepanja tjakep. aer moekanja terang serta manis, tjambangnja item dan ramboetnja tjampoer sedikit oeban. Pakeannja sebagi bangsa Toerki kaoem moeda, menoeroet toeladannja almarhoem Sultan Mahmoed: djas item, tjelana aboe-aboe, sepatoe koelit dan satoe fez atawa kopia mera, jang orang Toerki biasa pake dari djeoman Sultan Mahmoed.
Poen ia poenja adjudant, Reouf bei, jang toenggang koeda sama-sama, ada pake pakean sematjem itoe.
Ali pacha jang tinggal di satoe gedong besar di tepi soengi Bosporus dan kesohor kaja serta dermawan, di itoe sore soeda kaloear pesiar aken dapet hawa jang njaman sambil pikir segala perkara jang ada diniat di dalem hatinja. Di roemanja ia tiada dapet pikir itoe perkara lantaran dapet sangkoetan dari istrinja jang lagi menangis dengen sedi, kerna ia poenja soedara lelaki baroe meninggal doenia.
Lantaran mendenger swara riboet, ini mantri besar bersama adjudantnja brenti di roema djaga. Ali pacha panggil sergeant djaga, seraja menanja:
