IV
PENDAPETAN PERTAMA DI KAPAL „ADLER."
Kira-kira satoe djem Juilus doedoek koepas kentang, ia brenti sabentar, sebab tangannja tjape. la taro pisonja dan memandang ka laen-laen bagian dari kapal.
Di atas dek ada banjak koeli bekerdja, matroos-matroos riboet soearanja memaki dan saben-saben kadengeran soeara treakan dari djceroemoedi jang kaloearken berbagi-bagi perkata'an jang tiada pantes didengar oleh orang baek-baek. Julius mengarti, semoea orang di ini kapal ada kasar adatnja, maka sala sekali ajahnja kasi ia bekerdja pada firma Jager & Co., jang poenja itoe kapal.
Dengen mendadak tiada kadengeran lagi soearanja matroos-matroos, sedeng semoea koeli ada bekerdja dengen radjin. Itoe waktoe kapitein Fischer naek di dek dan berdjalan dengen pelahan sambil isep tjeroetoe.
Hans Fischer, kapitein kapal ADLER ada kasar adatnja, moekanja bengis dan pakeannja mesoem. Sasoeda preksa koeli-koeli bekerdja, ia djalan bersama djoeroemoedi Franz Kreiler jang kasi taoe ini dan itoe. Kamoedian ia berdoea dateng di tempat Julius doedoek. Kapitein Fischer lantes menanja pada djoeroemoedinja:
„Apa ini anak jang maoe bekerdja pada kita orang?"
