XXIII.
TIADA DAPET BANTOEAN.
Samentara ini pintoe bangsal dari Serdar Ekrim telah terboeka dan doea orang lelaki berdjalan masoek, doea-doea ada pake pakean generaal. Jang satoe ferik atawa generaal Tahir pacha, ada saorang Arab, moeka dan tjambangnja item, matanja djeli, moekanja tjakep serta badannja tegep, sedang generaal jang laen ada Rifaat pacha, chef dari generale staf.
Rifaat pacha ada saorang Toerki, badannja gemoek, adatnja kasar, kendatipoen ia dapet pladjaran Europa dan pande bitjara bahasa Frans dan bebrapa bahasa laen dari bangsa koelit poeti, djoega ia ada males, soeka minoem-minoeman kras dan lebi soeka perloeken kaperloeannja
sendiri dari pada segala oeroesan negri.
„Salam aleikoem!” kata Tahir pacha sambil peloek tangan dan manggoet pada Serdar Ekrim sebagimana adatnja orang Moslim membri hormat.
Rifaat pacha poen toeroet manggoet pada Mohamed Ali pacha dan bitjara dalem bahasa Frans:
Bonsoir, mon cher maréchal! Je suis ravi de vous revoir en si bonne santé.[1]
- ↑ Slamet raalem, toean maarschalk jang terhormat! Hati saja amat senang, sebab bisa berdjoempa pada toean dalem keada‘an waras.”
