XIV.
DI DOESOEN ISNIK.
Djikaloe orangg kaloear dari kota Prilip, menoedjoe ka djoeroesan Oetara, toeroet djalanan ketjil jang teroes ka watesnja Albanie, sasoeda liwat di kebon-kebon djagoeng, sawa roempoet dan oetan-oetan kajoe, orang nanti liwat di satoe tempat, di mana ada banjak soengi-soengi ketjil; di satoe fihak ini tempat ada satoe rimba ketjil dan di laen fihak ada sawa-sawa baroe.
Di tenganja ada bebrapa banjak roema kajoe, ditoetoep atep. Ini tempat ada doesoen Isnik atawa Bjela, di mana ada satoe gredja Griek di tenga satoe kebon kembang.
Dalem ini doesoen Isnik ada kira-kira sariboe orang pendoedoeknja bangsa Bulgaar jang berasal dari tepi soengi Donau; iaorang ada orang-orang tani jang baek, doeloe iaorang tinggal di Schoumla, di mana marika itoe soeda oesahaken sawa-sawa, piara hewan, tenoen pakean dan bekerdja pada orang-orang hartawan kaoem Islam. Apa latjoer soeaktoe hari iaorang dapet satoe pendita Griek dari Konstantinopel jang soeda berboeat perkara djelek di Schoumla.
Ini pendita soeda poengoet oewang soembangan jang tiada moesti dipoengoet, djoega ia maen gila sama prempoean-prempoean moeda dan sringkali mabok minoeman kras, jang dikasi nama
