doek dekat hakim-hakim di sabelanja njonja Liou, jang djoega soeda di rasa oleh itoe president dari pengadilan misti ada sama-sama pada ini preksaän.
Djoega itoe toekang madat glap dan sobatnja, toean Arthur, jang soeda bekerdja banjak atas menangkepnja itoe pemboenoe, ada sama-sama. Itoe Radja moeda soeda mengirim satoe officier akan mengadakan dia.
Ming soeroe diam itoe orang-orang jang datang nonton, jang soeda toetoep moeloetnja sahabisnja dia-orang di poekoeli dengan tjamboek oleh soldadoe-soldadoe policie. Tatkala orang-orang soeda berdiam baroe itoe
president angkat bitjara dan tanja itoe pesakitan:
― Angkaoe betoel Tchou, bekas toekang potong di Founsi?
― Tchou ada saija poenja nama,―menjaoet itoe orang,― dan doeloe saija djadi toekang potong di Founsi.
― Apa angkaoe soeda boenoe itoe Lin pada malem kawinnJa?
― Ja, itoe saija soeda bikin.
― Dan kenapa angkaoe soeda berboeat itoe kedjahatan?
― Sebab saija hendak membales sakit hati.
― Angkaoe membales sakit hati? Kapada siapa?
― Kapada Liou Siou, jang soeda bikin djoesta pada saija dan jang soeda kawin sama orang lain, komedian dia soeda tertawa mesam pada saija, dia soeda kirim
kembang pada saija dan dia aoeda berdjandi hendak kawin sama saija.
― Angkaoe djoesta, bangsat! ― kata njonja Liou jang tiada bisa tahan maranja tempo dia dengar jang anaknja di terka soeda berboeat demikian,― angkaoe djoesta!
Tchou menjaoet, tetapi dia liatin iboenja Liou Siou dengan marah dan angkat poendaknja.
― Itoe prampoean moeda, ―berkata itoe president,― belon taoe ambil ferdoeli dengan angkaoe.
― Me-Kiou, dia poenja baboe, soeda boeka bitjara antara kita berdoea.
― Itoe baboe soeda bikin djoesta kapadamoe. Belon satoe kali dia taoe bitjara pada nonanja dari angkaoe dan belon taoe satoe kali dia taoe trima soeroehan dari Liou Siou akan bilang jang itoe prampoean moeda tjinta kapadamoe.
― Pada itoe tjarita dia baroe dapet trang dari djoestanja Me-Kiou kapadanja, lantas itoe bekas toekang potong merasa goematar sagenap badannja dan orang bole liat jang moekanja ada djadi poetjat.
Lantas dia dapet ingat itoe boedjoekan dari itoe baboe, itoe perbilangan dari hal nonanja poenja diam dan djoega d1a mengarti jang Me-Kiou soeda lemparin
dia pada itoe malem itoe doea kembang dari djandela, jang soeda bikin dia terlebi bimbang.
Betoel misi ada katingalan itoe saketes aer jang dia soeda trima di matanja pada itoe hari koetika Liou Siou lagi siram kembang, djoega itoe tertawa jang njaring dari itoe nona jang moeda, tetapi itoe samoea tiada bole menoendjoek satoe apa dari hal perboeatannja Liou Siou. Bole djadi jang itoe aer jang soeda kabetoelan djato di moekanja dan itoe tertawa bole djadi jang dia soeda tertawa dari lain apa-apa.
Itoe fikiran jang lantas soeda datang pada Tchou ada bikin dia lebi sakit dari semoea itoe pekakas-pekakas kaniaija-an dalem doenia ini.
Dia belon taoe satoe apa dari itoe peprangan bangsa Inggris ka poeloe Ladronen, kerna dia soeda berangkat ka Canton pada itoe pagi jang Wang-mu soeda di bikin binasa, dan dia ingat dengan marah sampe moeloetnja
kaloear boesa, jang dia soeda kasi itoe Me-Kiou jang soeda begitoe brani bikin djoesta sama dia, kapada Woumpi kerna dia poenja girang dari hal bakarnja itoe kapal
Si Ladjoe dari Perkins dan dari itoe beklai-an di Lamma; sabenarnja dia soeda misti bawa itoe Me-Kiou ka Canton.
Djikaloe dia soeda tiada kasi itoe prampoean kapada Woumpi, tentoe sekarang Me-Kiou ada berdiri di hadepan hakim bersama-sama dia dan dia poenja pembales hati sakit bole kena pada satoe orang.
Itoe penjasalan, jang orang bole batja di moekanja, soeda bikin dia poenja moeka djadi leb1 djelek.
― Betoel sajang jang itoe baboe sekarang soeda mati, ―berkata Ming,― sebab tentoe sekali dia nanti mengakoe dia poenja persalahan. Satoe dari angkaoe poenja pembantoe bernama Woum-pi, oleh siapa angkaoe soeda soeroe mentjoeri itoe baboe, biar soepaija dia tiada bisa djadi saksi akan mengentengkan dia poenja nona, soeda boenoe Me-Kiou sebab dia tiada soeka jang itoe baboe misti djato di tangannja itoe orang-orang, jang sebab hendak membales djahat, soeda bikin bresi itoe tempat dari itoe bangsat-bangsat, atas siapa angkaoe ada djadi kapala.{[div end}}
― Saija tiada mengarti angkaoe poenja bitjara, ―berkata Tchou dengan heiran jang tiada terkira.
Dengan satoe doea pekataän Ming tjarita kapadanja apa jang soeda djadi di poeloe Ladronen, ―pada ini tjarita Ming tiada loepa akan poedji Perkins sabentar-bentar,― waktoe mana Tchou ada bernanti di satoe praoe kembang akan datangnja itoe waktoe jang itoe doea orang misti di hoekoem.
Koetika Tchou dengar ini kabar matanja lantas mengambang dara dan jang djaga dia ada terpaksa akan pegang lebi kras itoe rantenja, sebab dia soeda bergerak
akan menoebroek itoe toekang madat glap jang dia soeda dapet kenalin ada doedoek dekat pada hakim-hakim.
― Laen dari pada itoe, ―berkata Ming,― kendatinja nona Liou Siou soeda menjaoetin angkaoe poenja kabimbangan, barang apa jang tiada bole di kira, maka angkaoe poenja kedjahatan misi djoega ada boesoek, sebab itoe Lin tiada ada poenja salah dan angkaoe soeda boenoe dianja. Begimana roepa angkaoe soeda bikin mati sama dia?
Pesakitan tiada menjaoet. Dia lagi fikirin dia poenja kabentjian dan dia menjesal sekali jang dia ada terikat disitoe, kerna dia tiada bisa bikin satoe apa.
Ming menanja lagi satoe kali dan tempo Tchou tiada djoega maoe menjaoet lantas dia kasi satoe tanda kapada algodjo.
Itoe algodjo bersama hamba-hambanja lantas berlompat boeroe pada Tchou.
Tempo dia-orang pegang sama dia, roepanja dia baroe bangoen dari fikirannja dan bilang:
