— 8 —
Memangnja Landru soeda perna djadi satoe escroc (penipoe) dan satoe chevalier d' industrie (toekang tjari harta) dan dalem tahon 1902, lantaran gelapken oewang, Landru soeda ditangkep oleh politie ; boeat ini hal Landru dihoekoem lamanja tiga tahon.
Saja soeda beroentoeng dapetken soerat papreksa'an dari ini perkara, aken tetapi lantaran ini ada satoe perkara jang biasa, maka tida heran djikaloe itoe koetika tida ada satoe soerat kabar jang wartaken hal itoe.
Satelah Landru kaloear dari pendjara, sigra ia berkoempoel kombali sama sobat-sobatnja jang terkenal sebagi orang-orang jang tiada baek.
Sedari itoe waktoe ia lakoeken banjak sekali kadjahatan, aken tetapi ini samoea dilakoeken dengen tjara jang tjerdik dan ati-ati sekali, hingga politie sendiri bilang bahoea Landru sasoenggoenja ada satoe pendjahat jang loear biasa tjerdiknja.
Di Parijs, Marseille, Avignon, Lyon dan Toulouse, dengen goenaken àkal-akal jang tjerdik dan omongan jang manis ia soeda tipoe banjak orang. Lantaran maloe sama perboeatannja Landru jang tjoba dapetken sasoeap nasinja dengen djalan tida halal, maka ajahnja Landru dalem tahon 1912 soeda boenoeh dirinja sendiri.
Inilah ada djadi sitoe katrangan bahoea Landru boekan ada toeroenan pendjahat.
Pelahan-pelahan Landru ambil kadoedoekan jang teroetama dalem golongan pendjahat di Parijs. Ia ada bladjar dalem oeroesan automobiel dan dalem sedikit waktoe sadja ia soeda djadi paham betoel dalem itoe vak — baek perkara automobiel maoepoen motorfiats. Boekan ini sadja jang dipahamken oleh ini pendjahat, hanja ia soeda tjoba beladjar djoega tjara bagimana menjamboeng wadja dengen goenaken perkakas samboeng jang bisa bekerdja sendiri. Boeat ini oeroesan djoega Landru dengen tjepet soeda djadi sitoe toekang jang pande, dan kapandeannja itoe tiada kala dengen satoe toekang.
Orang traoesah djadi heran sama Landru poenja, kapinteran sebab perkara kadjahatan jang ia lakoeken, sebagimana di bawah ini kita aken tjeritaken, menoendjoekin jang ia betoel-betoel ada satoe pendjahat jang tiada ada tandingannja.
Dari papreksa'an jang dibikin, ada ternjata bahoea sedari
