— 7 —
Samoea pembatja nanti bilang jang ini perkara sasoenggoenja ada sanget menarik hati, apapoela pembatja sabagian besar soeda taoe dari wartanja soerat-soerat kabar,tjara bagimana Landru soeda lakoeken kadjahatan atas dirinja itoe orang-orang prampoean. Apa jang saja aken toetoerken disini adalah katrangan jang saja sendiri dapet koempoel, jaitoe sasoedanja koendjoengin tempat-tempat dimana Landru doeloe bersarang, maka tidalah heran bagi pembatja djikaloe di sini saja bisa toetoerken dengen pandjang lebar hikajatnja itoe „srigala" jang beroepa manoesia.
Tentang pengidoepannja Landru sebagi anak-anak, sedikit sekali kapentingannja boeat ditoelis disini.
Landru terlahir dalem tahon 1869 dan ada djadi anaknja satõe koeli jang ada toentoet satoe pengidoepan dengen pantes. Ajahnja Landru ada satoe stoker, sedeng iboenja ada satoe toekang mendjait, tetapi toch dengen sanget tida taoe maloe Landru mengakoe di hadepannja njonja Fernande Segret bahoea ajahnja ada satoe fabrikant jang ternama. Koetika Landru masih doedoek di bangkoe sekolah, ia ada terkenal sebagi satoe moerid jang paling pinter dan kamoedian ia soeda beroentoeng bisa dapet kadoedoekan onder-diaken (candidaat padri) dalem gredja.
Landru soeda perna berkerdja pada satoe architect dan koetika ia masoek dalem golongan militaire, ia soeda bisa dapetken kadoedoekan onder-officier.
Tatkala ia masoek poela dalem maatschappij, ia soeda menika sama satoe nona Parijs dan sabelonnja ia beroesia tigapoeloeh tahon Landru soeda djadi ajah dari ampat anak. Kamiskinan itoe koetika ada menjerang dengen sengit pada dirinja Landru, dan lebih latjoer lagi itoe koetika ia tiada- ada djabat pakerdjahan apa djoega, maka boleh djadi inilah lantarannja hingga Landru moelai tjampoer sama bebrapa pendoedoek di Montmartre jang namanja tiada begitoe baek. Blakangan Landru sendiri soeda djadi satoe pentjoeri, pakerdja'an mana beroentoeng tiada dikatahoei oleh istrinja.
Di antara kontjo-kontjonja Landru ada terdapet djoega satoe orang jang djoeal mas-inten dan ia inilah ada itoe orang jang „dandania" barang-barang mas berasal dari tjoerian.
Ini toekang mas ada adjarin Landru bagimana satoe „blaaspijp" digoenaken dan sedari itoe waktoe Landru madjoe satoe tindak dalem ia poenja lelakon sebagi satoe pendjahat.
