-84-
poerja kapala tentang apa jang terdjadi, pada Lauw Soe Sam ia berkata: „Harep toewan soeka ma,afken, oleh kerna kita poenja oewang contant soeda abis, sekarang kita belon bisa membajar, tapi kita maoe soejoean sala-satoe kawan'koe pergi mengambil oewang.“ Berkata sampe di sini ia berpaling pada itoe kawan jang baroesan ia soeda kasi tanda sembari berkata lagi: „He, A Hin, kaoe pergi poelang ambil lagi oewang, djangan kapalang tanggoeng, tiga riboe tail perak, sebab ini malem akoe maoe maen besar sama ini toewan.“
Itoe boewaja jang bernama A Hin lantas bilang baek dan berlaloe dari itoe kamar; sedeng Lauw Soe Sam oendjoek roepa jang seperti koerang, senang dan menggrendeng sendirinja: sekali, kita orang maen dengen oewang contant melek-melek, jang poetihnja seperti saldjoe; kaloe akoe poenja pasangan mati tentoe dikedoek, dan sekarang kena tida lantas dibajar. Saoepamanja tida ada oewang contant-medja, apa sebab tida maoe toelak sadja akoe poenja pasangan itoe?
Itoe bandar lantaran masi belon bisa mendapet kapastian moesti mengambil sikep bagimana, itoe waktoe terpaksa moesti bersenjoem-senjoem dan meminta ma'af, kamoedian ia berpaling pada sala-satoe kontjonja sembari berkata:
„Boen-ko, akoe liat kaoe baroesan menang,“ kata ia, „tjoba kaoe kasi pindjem doeloe brapa banjak oewang jang kaoe ada poenjaken, soepaja akoe bisa membajar pada ini toewan; sabentar kaloe si A hin dateng bawa oewang, akoe lantas ganti.“
Itoe orang jang diseboet Koen lantas kaloearken semoewa oewangnja, ternjata tjoema saratoes limapoeloeh tail perak lebih. Satoe kontjo laen jang
