— 10 —
sendiri,“ mendadak ia oendjoek sikep soenggoe-soenggoe, kamoedian dengen tida merasa lagi ia mengawasin ka djoeroesan di mana itoe tiga peti oewang ada ditaro.
„Ja, ja, akoe salah sekali soeda maoe memaksa pada kaoe, Tio Piauwsoe,“ kata ia dengen soewaranja saorang sedar, „malah akoe poen soeda minoem tjoekoep, dan sekarang boleh soeroean djongos bawa nasi.“
Begitoelah iaorang lantas brenti minoem dan makan nasi. Kamoedian djongos hotel dateng membawa nenampan boeat angkoetin itoe piring mangkok bekas. Ong Ban Kim lantaran soeda sinting lantas sadja mengotje seperti betet jang lagi makan pete, poedji Tio Beng satinggi langit, sebagi satoe toekang popio jang paling djempolan dan tida ada bandingannja. Hek-hoei-houw tjoema bisa mengangkat poendaknja dan tida begitoe maoe mengopenin omongannja itoe orang mabok. Achir-achir Ong Ban Kim djadi moelai lesoe, beroelang oelang ia mengoewap dan teroes naek di pembaringannja tidoer dengen tida memboeka doeloe pakeannja. Kaloe sadja Tio Beng soeda berkenalan lebih lama pada Ong Ban Kim, nistjaja ia aken merasa heran atas sintingnja itoe soedagar Sansee. Sebab ia itoe sabetoelnja ada satoe lodong , jang dojan dan koewat sekali minoem, dan apa jang itoe waktoe ia soeda minoem, sebetoelnja belon tjoekoep boeat bikin itoe orang Sansee djadi mabok dan djato poeles. Tapi Tio Beng kiraken itoe soedagar Sansee ada satoe pemabokan jang takerannja tjetek, maka ia tida tjoeriga apa-apa.
Begitoelah dengen perlahan itoe anem penggawenja Tio Beng poen pada mengoewap, dan satoe per satoe oendjoek roman jang sanget lesoe, hingga Tio Beng
