lah maitnja itoe prempoean tjilaka jang sia-siaken tjintamoe, 'nko Tiong-gie!”
Tjiap sänget penasaran sekali, koetika meliat ini kali marika poen tida goebris iapoenja oetjapan. Ia menangis dan laloe lari kloear.
Di loear ia ketemoe pada itoe prempoean tjantik jang tadi toeloeng dirinja.
„'Ntji, akoe poenja papa, mama, soedara-soedara dan akoe poenja Tiong-gie boleh djadi marika semoea soedah gila!” katanja Tjiap dengen penasaran. „Marika semoea seperti toeli, boeta dan gagoe! laorang tida maoe kenal lagi padakoe .....!”
„Djangan sedih, 'dék,” saoetnja itoe prempoean ajoe. „Kita nanti bikin marika soepaja maoe kenal pada kita, itoe manoesia-manoesia jang angkoeh .....”
Lebih djaoeh itoe prempoean hiboerin Tjiap.
„'Ntji, kaoe soenggoe baek; tapi akoe belon kenal, siapakah kaoe?” kemoedian Tjiap menanja.
„Akoe poenja nama Tjiat, Oey Tjiat Nie,” saoetnja itoe prempoean moeda.
„Di mana kaoe tinggal?”
„Doeloe akoe tinggal di itoe roemah jang kaoe tinggalin. Tapi kemoedian akoe tida perloe roemah lagi, Toehan telah kasih anoegrah, di segala tempat akoe boleh tinggalin, tida oesah takoet
