’HIDOEP’
53
begitoelah Tiong-gie menggerendeng dalem hati.
Di doenia memang banjak terdjadi hal-hal jang gandjil. Apa jang diharep dengen soenggoehan, seringkali djadi kapiran; dan apa jang boeat maen-maenan terdjadi dengen soenggoehan. Ini hari kita tertawa berkakakan, besok kita menangis menggeroeng-geroeng; ini hari kita menangis tersedoe, besok kita bisa tertawa terpingkel.
Malem itoe, agar pikirannja tida ngelamoen terlaloe moeloek, Tiong-gie laloe goenaken boeat meloekis sairan.
Iapoenja tangan tjoret-tjoret atas kertas poetih dengen potlood brapa baris kata-kata, kemoedian ditambah, dirobah dan diboenoeh brapa patah, laloe ditoeroen dan di-typ:
SANG KEMBANG:
Kaoe, oh, sang Kembang,
Merawat kaoe tida gampang,
Tapi djika kaoe berkembang,
Tertjantoem pada laen tjabang.
Djika dateng moesin terang,
Siram tida boleh djarang,
Tapi setelah djadi kembang,
Menantjep dada laen orang.