52
TJERITA ROMAN
„Tapi ada lebih baek, akoe jang menggali dan tanem, besok kaoe jang petik kembangnja............. Seperti kaoe........”
„Kenapa akoe?”
„Kaoe poenja ajah djadi toekang kebon, tanem dan rawat kaoe, tapi setelah berkembang, jang petik laen orang......”
Selebar moekanja Tjiap berobah merah, matanja jang djernih menjorotken sinar jang bergoemirlap, dan dengen ketjepetan sebagi kilat, Tjiap poenja djari-tangan jang lantjip dapetken korban Tiong-gie poenja paha.
„Tjiap, djangan marah, ja, akoe tjoema memaen,” kemoedian Tiong-gie berkata sambil berdjengit kerna kesakitan. „Akoe tjoema memaen. agar ini tempat jang sepih tida kesoenjian.....”
Malemnja, kerna siang kenjang makan bantal, Tiong-gie tida bisa lantas tidoer, hanja doedoek ngelamoen di kamar toelis.
Dalem lamoenan itoe ia mendoesin, ia tida haroes adjak Tjiap bertjanda atawa goejonan lebih djaoeh, kerna Tjiap jang masih moeda roemadja, roepanja aken salah anggep, salah doega, hal-hal jang tjoema sekedar boeat goejonan nanti dianggep soenggoehan.
„Oh, biarlah, hatinja itoe gadis jang masih soetji, aken tinggal soetji, sampe nanti dateng itoe laen tangan jang petik iapoenja hati........”
