Benerlah, Tiong-gie ada itoe kekerasan. Plahan-plahan iapoenja angen-angen dapet menangken iapoenja perasa'an-perasa'an, dapet lakoeken peringetan-peringetan jang meloekaken hati.
Seboelan, doea boelan, setaoen, doea taoen, Tiong-gie merasa tjotjok bertinggal di itoe tempat jang soenji, djaoeh dari kesenengan, tapi poen djaoeh dari penggoda. Ia merasa beroentoeng tinggal di Pasir Mas, maski di sitoe ia tjoema dapet gadjih jang ketjil sadja dan hidoep dalem kesepihan.
Iapoenja toeboeh jang doeloe koeroes, sekarang tertampak rada gemoekan, dan iapoenja paras moeka jang tadinja goerem, sekarang tertampak rada bersinar.
Tiong-gie ada poenjaken satoe kawan, jaitoe Liong-séng, djoeroe-toelis dari onderneming Pasir Mas, masi sama moedanja, sama boedjangnja dan sama bertinggal dalem satoe tempat tinggal dari itoe roemah jang besar.
Antara ini doea pemoeda tida pernah tertampak perhoeboengan jang kekel, tapi sebenernja ia ada satoe sobat jang melebihin dari sobat. laorang ada sama-sama pendiamnja dan satoe sama laen tida soeka mengretjok masing-masing poenja oeroesan.
Soeatoe hari Liong-seng telah ketemoein
