40
pertandaän, dan di itoe waktoe djoega kapal Amalia poen membri pertandaän dengan lantera, hingga Dantes dapat taoe, bahoewa kapal jang maoe trima moewatanja Amalia, soedah datang, dan samoewa orang-kapal misti bekerdja.
Dairi sebab adanja itoe pertandaän di kapal Amalia, orang-orang di kapal jang mendatangi itoe, mendapat taoe, bahoewa tida ada bahaja satoe apa aken ia orang trima moewatan; maka sigralah djoega kapalnja itoe datang dekat pada daratan dan lantas melaboeh djangkar. Komoedian sekalian orang kapal lantas bekerdja aken pindahken moewatannja Amalia.
Sambil bekerdja, Dantes ada ingat, bahoewa kaloe ia bri taoe rasianja, tantoe sekalian orang kapal nanti bersoerak kerna girang dan lantas bantoeän ia tjari moeloetnja gowa; aken tetapi tida sekali Dantes itoe maoe boeka rasia hanja ada merasa takoet, kaloe-kaloe orang ada mendoega apa-apa dengan lantaran melihat kalakoeännja.
Pada esoknja, di waktoe pagi, Dantes mengambil satoe sinapan dengan serbanja, laloe bri taoe pada teman-teman, bahoewa ia hendak menembak kambing hoetan, jang banjak kalihatan melompat lompat di atas karang. Tida sekali ada jang doega apa-apa; samoewa orang ada kira sadja, jang Dantes uemang soeka memboeroe heiwan. Tapi Jacopo minta mengikoet kapadanja, dan Dantes
