30
Maka setelah kaloewar dari roemah toekang-soekoer, teroes sadja Edmond berdjalan ka roemah toekang pakean dan membeli di sitoe seperangkat pakean matroos.
Komoedian Edmond lantas berdjalan poelang ka kapal dan poelangken pakeannja Jacopo.
Kapitein kapal maoe bikin djandjian sama Edmond boewat perkara jang berdjalan lama; tapi Edmond, dari sebab ada poenja niatan lain, melinken maoe bikin djandjian boewat tiga boelan sadja.
Sekalian orang di kapal Amalia itoe ada radjin sekali dan menoeroet betóel pada perintahnja ia orang poenja madjikan, jang tida biasa sia-siaken tempo. Baroe delapan hari ada di palaboehan Livorno, kapal Amalia itoe soedab termoewat penoeh dengan roepa-roepa barang jang dikaloewarken dengan tida membajar beja, dan aken dibawa ka poelo Corsika. di mana ia nanti ditrima oleh bebrapa orang dan nanti di kirimken ka Frankrijk.
Sigralah djoega kapal Amalia itoe soedah berangkat dan sigralah djoega ia sampe ka tampat penoedjoeannja, sasoedahnja berlajar doewa hari. Ia sampe ka tampat itoe di waktoe soedah gelap dan oleh kerna ada pertandaän dari kapal, jaitoe lantera jang digantoengken pada tampat bandera, maka pada waktoe malam datanglah ampat praoe mengamperi dari palaboehan kapada kapal Amalia, aken trima dan bawa ka darat barang-barang moetannja kapal itoe.
