1036
toeloeng sama akoe. Orang maoe mengomong sama akoe, dengan ampat mata sadja, itoe tanda jang ada hal rahasia. Ini sekali akoe nanti taoe apa misti bikin. Bertuccio tentoe di kirim oleh itoe orang penoeloeng akoe.
Si pendjaga priksa-priksa doeloe itoe soerat bersama-sama dia poenja loerah, soedah itoe, maka Andrea dapet permissie naik ka atas loteng, aken bitjara ampat mata sama Bertuccio. Girang Andrea boekan alang-kapalang. Kamar itoe bagoes dan bersih, poetih di sapoe kapoer, maka itoe senanglah pengliatan orang. Di itoe kamar ada tempat tidoer, ada medja, ada korsi, ada dapoer boewat bikin panas itoe kamar di moesin dingin. Bertuccio lantas doedoek di korsi; Andrea doedoek di pinggir tempat tidoer dan si pendjaga pegi tinggalin orang berdoewa itoe sendirian.
Maka Bertuccio moelai berkata: „Na beromonglah apa jang angkau soeka maoe berkata.”
„Na, angkau bagimana?” Berkatalah Andrea.
„Angkau bitjara lebi doeloe, berkatalah Bertuccio.
Wah, boekan, angkaulah jang haroes kasi taoe sama akoe segala kabar jang baroe, sebab angkau jang dateng tjari sama akoe.
Baiklah! Kaloe begitoe angkau soedah bertambah tambah perboewatan djahat moe, angkau telah memboenoeh dan merampok.
„Begitoe? Kaloe angkau dateng di sini dengan niat boewat tjerita segala begitoewan pada akoe, tida oesah angkau bikin soesah-soesah boewat adjak sama akoe beromong-omong dengan ampat mata. Itoe semoewa akoe soedah taoe loear kepala; aken tetapi ada masih laen hal jang akoe tida taoe; lebi baik inilah kita omongin, siapakah soedah soeroeh padamoe dateng kemari?”
1037
„Ha! ha! toewan ada terlaloe keboeroe napsoe, djangan begitoe Benedetto.”
„Benar apa tida, anggoeran djangan omong-omong kosong. Katakenlah siapakah jang soeroeh padamoe dateng kemari?”
„Tida satoe orang.”
„Bagimanakah angkau taoe, jang akoe ada di dalem pendjara?”
„Boekankah akoe soedah lama kenalin padamoe, doeloe di Champs Elijsees, kendati angkau berpakejan bagimana tjakep lagi, dan angkau doedoek dalem kreta pegang les sendiri.”
„Champs Elijsées! Ha! sekarang ampir sampe di mana akoe maoe dateng. Champs Elijsees, baiklah, kita beromong-omong dari akoe poenja papa, kan?”
„Na, akoe ini siapa?”
„Angkau toewan, angkau ini akoe poenja papa piarah. Tetapi menoeroet pengrasa-ankoe, boekannja angkau jang soedah kasiken padakoe bilang ratoes riboe frank, jang akoe bikin abis dalem ampat lima boelan; lagi poen boekannja angkau ini jang bikin akoe dapet papa orang Italia-an jang bangsawan; djoega boekannja angkau inilah, jang bawa akoe beladjar kenal sama orang besar-besar, koetika di panggil makan di Auteuil, jang sampe sekarang akoe masi rasa-in enaknja, di mana sekalian bangsawan di Parijs ada berhadlir, serta procureur karadja-an djoega ada bersama-sama, dan akoe soenggoe menjesel sekali, jang doeloe akoe tida beladjar kenal lebi baik lagi sama dia, kaloe tida sekarang ini, tentoe ada djoega goenanja bagi akoe. Djoega boekannja angkaulah jang djadi tanggoengan boewat akoe sampe dapet doewa miljoen, koetika akoe dapet tjilaka, orang dapetin sama akoe.
