»Ja!" sahoet satoe soldadoe: »masoeklah!"
Dantes hendak berkata lagi, tapi pintoenja kareta soedah diboekaken, dan ia merasa orang toelak padanja ka dalam kareta itoe. Setelah ia naik ka dalam itoe kareta, ia lantas berdoedoek dengan teräpit oleh doewa soldadoe, sedang doewa soldadoe jang lain berdoedoek di bangkoe di hadepannja dan di itoe waktoe djoega kareta itoe lantas berdjalan.
Kareta itoe ada mirip pada pendjara, kerna pintoe-pintoenja ada pake kisi-kisi besi. Lebih doeloe Dantes tida taoe ka mana kereta itoe menoedjoe; komoedian ia dapat kanjataän, jang kareta itoe ada berdjalan di djalanan Caisserie, dan dengan meliwat di djalanan St.-Laurent dan Tamaris ia menoedjoe ka tepi laoet.
Sigra djoega kareta itoe berenti di depan satoe roemah, dan dari roemah itoe lantas kaloewar doewablas soldadoe pengawal; Dantes melihat sindjata-sindjata marika itoe berkeredep di sinarnja api lantera.
»Apa orang kaloewarken ini kakoewasaän balatantara aken dirikoe ini?" kata Dantes di dalam hati.
Lekas djoega Dantes dapat penjahoetan aken pertanjaännja itoe; kerna tempo pintoenja kareta diboekaken oleh hamba politie, doewablas soldadoe itoe soedah mengadaken doewa barisan dengan lantaran berderek adep-adepan satoe sama lain, moelai dari depan pintoe kareta sampe pada der. maga palaboehan, hingga djikaloe toeroen dari kareta, Edmond Dantes misti berdjalan di antara doewa barisan itoe.
Doewa soldadoe jang berdoedoek di depan Dantes, toeroen paling doeloe dari kareta, laloe Dantes disoeroeh toeroen dengan diikoeti oleh doewa soldadoe jang tadi mengapit padanja. Komoedian marika itoe berdjalan menoedjoe pada satoe praoe jang ada sadia di pinggir dermaga. Sigra djoega Dantes soedah berdoedoek di bagian sabelah belakang di dalam itoe praoe dengan terdjaga oleh itoe ampat soldadoe, sedang hamba politie berdoedoek di bagian sabelah depan; ampat matroos lantas mendajoeng dengan keras, hingga sabentar djoega praoe itoe soedah sampe di loewar palaboehan.
Dantes ada merasa enak hati, oleh kerna sekarang ia menapas di oedara beresih jang berhawa sedjoek dan membri kasegaran padanja
»Ka manatah angkaoe ini membawa akoe?" kata Dantes pada soldadoe-soldadoe itoe
»Sebentar kaoe nanti dapat taoe," sahoet marika.
--- »Tapi....
»Kita-orang tida boleh membri katerangan apa-apa padamoe."
Dantes mengarti kaharoesannja orang jang djadi hamba; maka ia rasa, tida bergoena menanjaken apa-apa pada satoe hamba jang telah dapat perintah aken djangan menjahoet; sebab itoe djadilah ia berdiam sadja.
