GANDJARAN JANG PANTES
47
ngembeng, di matanja Sien Nio. Lagipoen Hok dirawat di klas rendah, di mana ia tida oesa bajar satoe apa, tertjampoer dengan orang segala bangsa dari golongan paling rendah jang diobatin di sitoe. Sien Nio rasaken hatinja seperti terdjepit, waktoe ia menampak itoe semoea.
Tiong Bie menghampiri lebih dekat, sedeng ia poenja istri dan anak mengikoetin.
„Hok, apa kaoe banjak baek?" tanja itoe bekas madjikan.
„Trima kasi, entjek, ada berkah, akoe poenja loeka-loeka tida berbahaja dan moelai semboeh, lagi tiga atawa ampat hari brangkali akoe bisa poelang."
„Akoe girang mendenger itoe katerangan. Hok, dan akoe dateng ka mari poen meloeioe boeat tengokin pada kaoe."
„O, banjak trima kasi, entjek, kaoe toendjoeken boedi jang berat sekali padakoe."
„Djangan bitjara begitoe, Hok, kerna sabetoelnja akoe jang moesti membilang banjak trima kasi pada kaoe. Sien Nio soeda toetoerken padakoe apa jang bisa dianggep djadi sebab hingga terbit permoesoehan antara kaoe dan itoe orang moeda jang berboentoet dengen itoe perklaian. Djikaloe akoe poenja anak tida minta kaoe poenja pertoeloengan, ini semoea tida aken terdjadi. Siapa kira perkara begitoe ketjil bisa berboentoet begini pandjang. Tapi senangkenlah kaoe poenja hati. Hok; kaoe nanti dapet kenjata'an, jang maskipoen doeloe akoe soeda lepas kaoe dari kaoe poenja pakerdja'an, sekarang akoe poenja anggepan laen sekali tentang kaoe poenja diri. Dan ini, apa kaoe poenja iboe?"
„Betoel, entjek, iboekoe masi sadja bersedih, biarpoen akoe poenja keada'an sekarang ada djaoeh le-
