— 26 —
„Apa kau ada djalanken pakerdja’an dokter?" menanja de Guiche poela.
„Boekan,“ djawab itoe orang, „tapi akoe mengarti djoega perkara loeka dan loeka jang akoe dapet boleh bikin akoe poenja djiwa djadi tiwas. Toeloeng bawa akoe di sala satoe tempat, di mana akoe bisa dapet ketemoe ratoe padri, atawa toeloeng tjariken satoe padri dan Allah nanti bales toean poenja boedi; akoe poenja roh jang perloe ditoeloeng, kerna akoe poenja badan, soeda tiada bisa ditoeloeng lagi."
„Meninggal pada waktoe dijalanken satoe perkara baek tiada nanti djadi dapet dosa, tapi Allah pasti toeloeng pada kau,” kata Raoul.
„Toean toean, demi Allah," kata itoe orang dengen swara sedi dan merinti, dan tjoba boeat bangoen, „djangan bikin ilang tempo dengen banjak bitjara jang tiada bergoena, toeloeng akoe sampe di sala satoe doesoen, atawa soempa boeat toeloeng prenta satoe padri dateng di sini. tapi akoe kira tiada nanti ada orang brani dateng, kerna iaorang taoe orang Spanjol ada deket ini tempat dan akoe nanti meninggal dengen tiada dapet diampoenken lagi akoe poenja dosa. „O! Allah! Allah!” meratap itoe orang dengen swara sanget sedi, hingga de Guiche dan Raoul djadi mengkirik, „Allah tiada nanti kasi idzin kedjadian itoe perkara, boekan ? Djikaloe sampe Kedjadian begitoe, betoel terlaloe sekali !"
„Djangan kwatir, toean,“ kata de Guiche, „akoe soempa, Kau nanti dapet apa jang kau inginken. Bilang sadja di mana ada roema jang kau kira bisa dapet toeloengan atawa satoe doesoen di mana ada padrinja,"
„Trima kasi, Allah nanti bales kau poenja
