— 17 —
banda dan aniaja pendoedoek di sana, orang orang jang tinggal di doesoen doesoen jang pernanja deket itoe tempat masing masing lari ka kota kota jang soeda dibikin tegoe. Di Arras soeda ada banjak orang jang dateng dari itoe tempat tempat.
Kabarnja tiada berselang lama moesti kedjadian satoe prang besar jang bisa kasi poetoesan dalem itoe perkara tjidra. Toean prins atoer balatentaranja dengen djalan sedikit moendoer, perloenja tjoema boeat dapet tempo soepaja balatentara bantoean jang dikirim padanja bisa sampe di itoe tempat.
Itoe angkatan prang boeat menoeloeng sekarang soeda sampe dan ini doea orang moeda rasa sanget girang hatinja, iasorang dateng sablonnja perkara prang dimaloemken.
Itoe malem iaorang bersantab sama sama dan tidoer dalem satoe kamar. Iaorang ada dalem oemoer, di mana orang gampang bisa djadi bersobat; menoeroet iaorang poenja pikiran, memang iaorang soeda kenal satoe pada laen dari waktoe sablonnja dilahirken dan oleh kerna itoe tiada nanti bisa berpisa lagi.
Soeda tentoe itoe malem tiada ada laen perKara jang ditjeritaken, tjoema perkara prang sadja; iaorang poenja pengikoet bikin tadjem pedang, sedeng iaorang isi iaorang poenja pistol, soepaja bisa sedia apabila diserang moesoe di djalanan. Pada waktoe pagi iaorang bangoen dengen sanget kesel roepanja, kerna iaorang doea doea dapet mengimpi, iaorang dateng keblakangan dan tiada bisa toeroet maloemken prang.
Itoe pagi ada tersiar kabar, prins van Conde soeda brangkat dengen balatentaranja dari
