— 9 —
soengi dan ia toedjoeken ka tempat di mana baroesan itoe orang ada keliatan. Dalem ini perkara Raoul ada sanget pande. Ia poenja tempat tinggal pernanja di tepi soengi Loire dan lantaran begitoe ia biasa maen di aer; bebrapa ratoes kali ia soeda menjebrang dengen koedanja dan dengen bernang sadja ia ampir saben hari menjebrang di soengi Loire Athos jang doega itoe perkara ada perloe boeat satoe orang peprangan soeda sengadja adjar ia bernang.
„Ja, Allah! Olivain treak lagi, „apa toean graaf nanti kata, djikaloe ia dapet taoe ini perkara?"
„Toean graaf nanti berboeat djoega sebagimana akoe lagi berdaja," kata Raoul dengen tjamboek koedanja.
„Tapi akoe! begimana akoe!" Olivain merinti dengen swara goegoep, „begimana akoe moesti menjebrang?"
„Lompat djoega di aer, pengetjoet!" Raoul bertreak.
Kamoedian pada itoe orang jang kira kira tinggal doeapoeloe pas lagi jaoenja Raoul kata:
„Tabaken kau poenja hati, toean, tabaken! Orang dateng toeloeng kau,“
Olivain lariken koedanja moendoer madjoe, tapi pengabisannja sebab maloe, ia kasi lompat djoega koedanja di soengi dengen bertreak :
„Slamet tinggal, akoe djoega maoe pergi mati!"
Praoe jang dibawa oleh aer jang deres soeda djadi semingkin djaoe dan orang orang jang ada di atas itoe praoe bertreak minta toeloengan.
Saorang jang keliatan ramboetnja soeda poeti
