— 183 —
poenja oemoer soeda ampatpoeloe sembilan taon, Akoe poenja moeka blon beroba.“
— „Boekan blon beroba, ampir orang tiada kenalken kau.“
— „O, akoe mengarti apa kau maoe bilang, d’Artagnan, tapi sekalian perkara ada watesnja.“
— „Dan akoe dapet kenjata’an, dalem oeroesan oewang djoega soeda ada perobahannja. Kau tinggal dalem satoe astana bagoes dan akoe kira ini astana kau poenja sendiri.“
— „Ja, satoe tana ketjil jang sebagimana koetika akoe baroe maoe brenti bekerdja akoe soeda kasi kau taoe, akoe telah dapet dari satoe familie.“
— „Kau ada poenja kebon kebon jang lebar, koeda dan andjing memboeroe.“
Athos tersenjoem.
„Ini kebon tjoema 20 bouw lebarnja dan dari itoe moesti dipotong lagi tempat tempat jang digoenaken boeat roema boedjang,” kata Athos, „istal dan laen laen; koeda akoe tjoema ada doea ekor, selaennja dari koeda boeat akoe poenja pengikoet. Andjing memboeroe ada ampat, tapi kau sendiri mengarti, itoe andjing boekan boeat akoe.“
„Ja, akoe mengarti,“ kata d’Artagnan, „kau sanget tjinta pada itoe anak moeda.“
„Kau soeda doega betoel, sobat,“ kata Athos.
„Itoe anak tinggal di sini dengen kau, apa ia ada kau poenja anak poengoet atawa kau poenja kaponakan?“ menanja d’Artagnan. „O, kau soeda beroba banjak, Athos!“
„Itoe anak,“ kata Athos dengen tiada beroba swaranja, „itoe anak, d’Artagnan, ada satoe anak piatoe jang iboenja soeda tinggalken pada
