— 182 —
apa jang ia soeda doega, hingga ia djadi bengong pikirken itoe perkara.
Athos dandan tangannja dan adjak djalan ka kebon.
„Sedeng orang bikin sedia boeat kita dahar sore,“ kata Athos dengen tersenjoem, „tentoe kau tiada nanti djadi koerang senang djikaloe akoe tjeritaken pada kau ini resia jang soeda bikin kau djadi berpikir.“
„Tentoe tiada, toean graaf,“ kata d’Artagnan jang lantaran liat begimana laen laen orang bangsawan hormat pada Athos, soeda djadi bingoeng dan tiada taoe betoel begimana ia moesti berlakoe pada sobat lamanja.
Athos awasin padanja dengen tersenjoem, laloe berkata:
„Lebi doeloe, d’Artagnan, akoe moesti kasi taoe, di sini tiada ada toean graaf. Betoel baroesan akoe soeda seboet kau ridder, tapi itoe perkara perloe ditrangken, soepaja orang boleh taoe, siapa kau adanja; tapi boeat kau sendiri, d’Artagnan, akoe harep kau nanti masi soeka pandang akoe sebagi Athos, kaupoenja sobat lama. Apa sengadja kau goenaken itoe peradatan lantaran kau soeda koerang soeka pada akoe?“
„Sama sekali tiada dan akoe harep itoe perkara tiada nanti bisa kedjadian,“ kata d’Artagnan.
— „Djikaloe begitoe biar kita berlakoe satoe pada laen sebagimana doeloe dan tinggal troes trang. Sekalian perkara di sini soeda bikin kau djadi heran, boekan?“
— „Betoel.“
— „Tapi jang paling bikin kau djadi heran, jaitoe akoe sendiri. Betoel apa tiada?“
— „Betoel, akoe mengakoe itoe perkara.”
— „Akoe keliatannja masi moeda, maski akoe
