341
ngadep dengen berloetoet dan kasih taoe, jang dia tidak dapet kabar dari datengnja Bwee Liang Giok, dan dari-itoe dia mintak tidak di kasih salah dari sebab tidak dateng menjamboet.
Bwee Liang Giok berkata: Kami soedah dapet taoe trang, jang kaoe ada djadi kawannja Louw Kie; tapi dari sebab kaoe poenja salah tidak sabrapa besar, sekarang kami lepasken sadja kaoe dari kaoe poenja pangkat. Kaoe misti serahken kaoe poenja tjap dan segala tanda kabesaran pada kami.
Itoe tikoan tidak brani bilang apa-apa, lantas sadja pergi poelang, ambil segala barang jang di mintak itoe dan tjepet dateng kombali, serahken itoe semoewa pada Bwee Liang Giok. Tempo dia balik kombali ka roemahnja, dia lantas soeroeh anak-bininja pindah dari kota itoe ka kampoeng atsal sendiri; dia sendiri menoenggoe doeloe sampe gantinja dateng.
Tempo itoe tikoan soedah serahken tanda. kabesarannja dan soedah poelang kombali, Bwee Liang Giok lantas panggil Touw Sin dan berkata padanja: Touw Sin! Sekarang kami angkat kaoe djadi tikoan di sini boeat. bales kaoe poenja perboewatan baik pada kami.
Touw Sin menjahoet: Taijdjin! Hamba barangkali tidak bisa pegang kerdja-an itoe.
