340
soedah berpangkat besar, patoet kaoe misti inget boewat bales baik sama Touw Sin dan Hi Tong.
Bwee Liang Giok menjahoet: Boe Tjhin poenja bitjara betoel sekali. Saja djoega lagi inget sama perkara itoe. Tempo saja di Kota Radja, saja soedah kasih taoe Hi Tong poenja hal pada Maha-Radja, dan Radja lantas kasih pangkat ketjil padanja dan kasih printah djoega boewat bikin koeboerannja. Dari hal itoe Touw Sin, biar dia toeroet sadja sama saja. Nanti kaloek ada kerdjaän terboeka, saja lantas kasih dia pegang kerdjaän itoe. Sekarang sebab saja misti pergi doeloe ka sana-sini aken priksa perkara, saja mintak Boe Tjhin brangkat sadja djalan doeloean ka Kota-Radja; saja nanti dateng belakangan.
Sasoedahnja itoe, Bwee Liang Giok lantas soeroeh sedia praoe aken iboenja pergi ka Kota-Radja, dan satelah semoewa sedia, Hoe Djin lantas brangkat. Kamoedian dari itoe Bwee Liang Giok djoega lantas brangkat ka Gi Tin Koan.
Tempo sampe di Gi Tin Koan, Bwee Liang Giok masoek di kota dengen menjaroe orang ketjil, dan dengen lantaran itoe dia djadi dapet taoe, jang tikoan di sitoe ada djadi djoega kawannja Louw Kie. Sasoedahnja balik kombali ka praoe, dia lantas soeroeh orang panggil itoe tikoan, jang lantas dateng me-
