297
baik baik; kerana besoek pagi baroe dia maoe kasi taoe perkara itoe pada Radja.
Khoe Kwe poenja boedak boedak lihat toewannja di tangkep, semoewa lantas toeroet balik kombali dan pergi kasi taoe sama semoewa poenggawa jang dia orang kira toewannja poenja sobat. Poenggawa jang denger hal itoe, semoewa djadi goesar sekali dan lantas kirim orangnja pada Khoe Kwe boewat kasi taoe, jang Khoe Kwe itoe traoesah takoet apa apa. Djoega semoewa poenggawa itoe soeroe panggil semoewa orang jang baroe habis bikin examen dan dapet pangkat Tjinsoe, boewat berdami soepaja semoewa Tjinsoe itoe masoek soerat pada Radja, aken. kasi toeloeng pada Khoe Kwe.
Sekalian isi negri lihat Khoe Kwe di tangkep dan sekarang misti menoenggoe poetoesan hoekoem dari Radja, semoewa ada merasa sakit hati; terlebih lagi tempo dia orang soedah dapet taoe apa sebabnja, maka Khoe Kwe itoe lari. Di antara orang orang itoe ada banjak sekali jang soedah toeroet djoega bikin examen, tapi tida katrima. Selagi marika koempoel bitjara, ada satoe orang jang dateng dan berkata: Ini kansin ada djahat sekali. Kita orang djoega nanti boleh kena terkaniaja. Paling baik, sekarang ini biar kita orang tjari akal boewat toeloeng sama itoe Ponggan, soepaja djangan orang bilang, jang
