296
Orang-orang di dalem kota ada banjak sekali jang bitjara satoe sama lain, katanja: Sajang sekali ini orang jang baroe dapet pangkat ponggan, saorang jang tjakep dan pinter, soedah tinggalken dia poenja pangkat dan teroes pergi. Taoelah dari sebab mendapet perkara apa sama Louw Kie, maka dia begitoe.
Sebab banjak orang-orang jang bitjara dari hal itoe, Louw Kie djoega soedah dapet denger. Dia djadi bertambah lagi goesarnja dan berkata: Itoe satoe binatang begitoe brani koerangadjar, tidak endaïn atoeran negri ? Dia rasa dia boleh toeroet soekanja sadja, maoe dateng atawa pergi? Dia nanti dapet taoe, bagimana kamistiannja!
Itoe waktoe djoega dia lantas kirim satoe soerat pada poenggawa perang jang ada di tangsi, soepaja poenggawa itoe bawak 500 soldadoe pergi soesoel dan tangkep itoe Khoe Kwe jang lari. Khoe Kwe tempo kasoesoel oleh itoe soldadoe soldadoe, hatinja lantas inget, jang sekarang tentoe dia misti mati. Dia tida bisa bikin apa apa; dari itoe dia lantas serahken sadja dirinja dan ikoet itoe soldadoe balik ka Kraton. Sasampenja di sana, Louw Kie lantas kasi prentah, soepaja orang bawak tangkepan itoe ka satoe tempat, jang biasa di pake toetoep poenggawa poenggawa, dan dia soeroe sa-orang djaga
