275
goehnja.
Tje Pek Hoe lantas bengong dan berkata: Begimana itoe?
Hoedjin lantas tjeritaken Bwee Liang Giok poenja hal semoewa, sabegimana dia soedah dapet taoe.
Tje Pek Hoe, sasoedahnja denger itoe tjerita, lantas berkata: Apa itoe semoewa ada betoel? Saja denger itoe, saja merasa sama djoega lagi mengimpi. Sekarang apalah saja misti bilang? Sebab Bwee Liang Giok soedah bertoenangan sama Hing Goan, biarlah kita tjari lain sadja boewat Ien Ing.
Hoedjin menjahoet: Loïa djangan tjerita begitoe. — Ien Ing dan Hing Goan, dia berdoewa soedah djadi rapet sekali bertjinta hati, dan tida maoe bepisah lagi. Sebab itoe, saja rasa lebih baik anak berdoewa itoe dipandeng sadja seperti satoe dan kawinken dia berdoewa pada Bwee Liang Giok.
Tje Pek Hoe denger begitoe, lantas tertawa; dia berkata: Kaloek Hoedjin inget begitoe, biarlah tetep djoega begitoe. Saja tidak nanti robah lagi, sebab saja djoega ada rasa, baik begitoe sadja.
Habis bilang begitoe, Tje Pek Hoe lantas pergi ka loewar, ketemoein Bwee Liang Giok, dan dengen tertawa dia berkata; Hiantit! Kaoe tinggal sama saja soedah kadoewa tahoen ini; tapi saja tidak dapet taoe Hiantit poenja ra-
