272
diri? Sekarang baiklah hiankhe boeroe-boeroe poelang sadja lebih doeloe, soepaja boleh senengin badan.
Tempo Bwee Liang Giok soedah pergi sedikit lama, Hoedjin rasa tentoe Tje Pek Hoe soedah ampir dateng.
Ija lantas berkata pada Hing Goan: Anakkoe tjobah sekarang kaoe pergi semboeni doeloe sebentaran dalem kamar, sebab kaloek kaoe poenja entia dateng, boetjhin maoe ganggoe dia sedikit.
Baroe Hing Goan masoek ka dalem kamar, lantas dateng satoe boedak, kasih taoe pada Hoedjin, jang Tje Pek Hoe soedah dateng. Hoedjin lantas adjak Ien Ing pergi ka loewar, boewat menjamboet datengnja Tje Pek Hoe.
Sasoedahnja Tje Pek Hoe masoek dan doedoek, Ien Ing lantas oendjoek hormatnja, dan teroes doedoek. Itoe waktoe Hoedjin lantas panggil boedaknja, dan berkata: Kaoe pergi panggil Siotjia, soepaja dateng di sini oendjoek hormat sama entianja.
Tje Pek Hoe denger begitoe, lantas dia tertawa dan berkata: Hoedjin! Apa Hoedjin mengimpi? Ini siapa? Apa boekan anak kita?
Hoedjin lantas tertawa dan kerkata: Ini Ien Ing lo-ia poenja anak; jang sekarang saja soeroeh panggil, itoe saja poenja anak.
Tje Pek Hoe lantas tertawa dan berkata : Ha ha ha! Hoedjin moelain main gila!
