271
dak itoe bilang pada Tje Pek Hoe, jang dia sama bebrapa boedak lain ada disoeroeh dateng menjamboet oleh Hoedjin, dan Bok Siang Kong djoega ada sama-sama.
Baroe itoe boedak habis bitjara, Bwee Liang Giok lantas dateng dan membri hormat pada Tje Pek Hoe. Tapi baroe dia maoe toeroen dari koeda, Tje Pek Hoe bilang, dia traoesah toeroen, sebab lantas maoe brangkat. Itoe waktoe djoega dia-orang semoewa lantas brangkat djalan.
Selagi di djalan, Bwee Liang Giok berkata pada Tje Pek Hoe: Selama taijdjin ada di Kota-Radja, boansing inget sadja pada taijdjin. Taijdjin lama tinggal di sana, apa sering djoega bertemoe sama Pang Lok Thian?
Tje Pek Hoe bilang: Saben hari djoega kami bertemoe padanja, dan dia djoega sering sekali bitjara dari kaoe poenja hal. —Mengapa kami lihat kaoe poenja badan bagitoe koeroes? Apa kaoe tiada dapet rawatan baik? Bwee Liang Giok bilang: Boansing tinggal dalem taijdjin poenja astana, ada seneng sekali, apa lagi Hoedjin soedah rawatin boansing sama djoega anak sendiri. Maka boansing ada koeroes, brangkali dari sebab boansing baroe baik dari sakit.
Tje Pek Hoe lantas berkata: Kaloek bagitoe, hiankhe ada koerang enak badan? Kenapa hiankhe dateng di sini bikin soesah diri sen-
