ADA DOEA!
Tapi ia mengarti Liang-hoen telah toendjoeken dirinja sebagi sobat jang baek.
Kim-djin laloe berpakean dan marika berdoea laloe pergi ka tokonja Tjin-tek.
Tempo dapet liat itoe doea orang Tjin-tek djadi tertawa.
„Mari masoek, di dalem kita boleh bitjara dengen laloeasa. Akoe soeda mengarti kaoe berdoea poenja maksoed,” bagitoe ia berkata pada itoe doea orang.
Baroe sadja marika sampe di roeangan pertengahan, dari dalem kaloear doea gadis, jang sama betoel parasnja, tjoema jang satoe ada sadikit pendek dari jang laen, tapi itoe perbeda’an ampir tida kaliatan. Marika saperti djoega sengadja, pake-pakean jang sama betoel.
Liang-hoen dan Kim-djin djadi bengong!
„Ada doea!” bagitoe masing-masing berkata di dalem hati.
Itoe doea gadis membri hormat pada itoe doea orang moeda jang belon bisa boeka soeara, lantaran masing-masing merasa heran sekali, bahoewa dalem itoe doea orang jang mirip parasnja. Tjoema sekarang, sesoedanja marika berdiri berendeng bagitoe, kaliatan djoega sadikit perbedahan. Bagitoelah itoe gadis jang lebi tinggi antara laen-laen mempoenjai djoega satoe tanda, satoe andeng-andeng di dekat ia poenja koeping kiri, tapi jang laen tida poenja jitoe tanda.
89
