Tjin-tek jang soeda doega lebi doeloe, lantes njataken ia poenja girang dan kasi kepastian bahoewa itoe pertoendangan soeda boleh dianggep ada tetap.”
„Ha! Ha! Ha!!!” tertawa Liang-hoen sambil tepok-tepok kadoea loetoetnja. „Loetjoe sekali! Kaoe mengimpi brangkali. Dalem bebrapa hari jang paling blakang itoe entjim bersama ia poenja anak prampoean ada di Bogor. Marika menginap di satoe hotel. dan akoe poen menginap di itoe hotel djoega. Saban pagi kita pergi djalan-djalan di kebon besar; di hari Minggoe kita pergi ka gedong Blaoe, saperti tjoema bisa dirasaken oleh sapasang merpati jang baroe bertoendangan.”
„Toch akoe bilang lagi sekali, akoe bertoendangan dengen anaknja itoe entjim.”
Sekarang Liang-hoen brenti tertawa, kerna liat sobatnja berkata bagitoe dengen soenggoeh-soenggoeh.
„Djin, dalem oeroesan bagini, kita tida boleh memaen dengen tjara jang meliwatin wates. Lagi sakalih akoe bilang, bahoewa anaknja itoe entjim soeda bertoendangan dengen akoe, Akoe larang kaoe bitjara dengen tjara memaen bagitoe tentang dirinja itoe gadis.”
„Dan akoe bilang, jang kaoe tida perloe bagitoe sombong, bilang telah bertoendangan dengen soedaranja engko Tjin-tek, sebab ia soeda djadi akoe poenja toendangan.”
