74
TJILIK ROMAN'S
⁂
Selagi Tien Nio merasaken itu kesukeran batin jang sanget heibat ada pun ajah dan ibunja lagi sedeng berduduk di ruwangan depan, sambil membitjaraken urusan perdjodohannja Lena dengen Tjong Bian. Pada waktu itu Sian Kheng baru sadja pulang, hingga ia sama sekali tida tau tentang kundjungannja ibunja Tjoan Hin, sampe istrinja tuturken padanja, jang ia suda tolak lamaran tersebut. Sian Kheng manggutin kepalanja menjataken setudju...... betul. Lama sekali Sian Kheng berdami dengen istrinja apa baek apa tida trima lamarannja Tjong Bian, sampe achirnja marika putusken buat trima perbaek sadja lamarannja itu hartawan Bandung. Tiga hari lagi suda sampe temponja jang entjek Sian Kheng musti briken ia punja putusan...... Sampe hari suda hampir gelap, masih sadja Lena tida keluar dari...... kamarnja Gadis itu lampiasken ia punja kesedihan sampe kedua matanja mendjadi merah. Kerna meliat Lena tida keliatan ibunja mendjadi heran, ia sama sekali tida mengarti hal apatah jang telah membikin itu gadis mendjadi begitu. Lantaran sanget sedi dan pikirannja di rasakan sanget kalut, Tien Nio sama sekali tida mendenger jang ibunja telah masuk kedalem kamar, sehingga bukan maen ia punja kaget kutika ibunja menegor kepadanja: „Hei...... Lena, kau kenapa? Apa kau sakit?” Lena tida menjahut, ia tekep mukanja dengen bantal jang suda mendjadi basa dengen aer mata. Tetapi menginget hal apa jang barusan telah terdjadi, maka njonja Sian Kheng bisa menduga apa jang mendjadi lantarannja. Terlebi pula memang ia tau jang gadisnja itu ada sanget rapet bergaulan dengen Tjoan Hin.
