HARTA LAWAN TJINTA
59
rechtslaan di mana Lena ada tinggal. Tjoan Hin mendjadi sanget terprandjat, kerna kutika ia menoleh kesatu djurusan, kebetulan sekali Lena lagi sedeng berdiri di depan pintu. Hatinja Tjoan Hin ada di rasaken sebagi djuga mau tjopot kerna djantungnja ada memukul dengen keras. Sepeda jang di naekin olehnja mendjadi limbung, hampir sadja ia kena kesamber oleh satu auto jang lagi sedeng di lariken dengen keras...... Tjoan Hin lalu membri hormat pada gadis itu dengen manggutin kepalanja, jang lalu bales dengen satu senjuman jang manis. Bagi laen pemuda jang kurang sopan, suda tentu kans itu tida nanti di sia-siaken dengen pertjuma, aken tetapi bagi Tjoan Hin jang pemaluan, tida ada laen djalan lagi dari pada...... lariken terus ia punja sepeda......
Marika terus berpandangan satu sama laen sekutika lamanja, sesudanja Tjoan Hin mengilang, barulah Lena balikin badannja dan terus masuk kedalem ruma. Setelah sinar matanja ke bentrok dengen sinar matanja Lena, jang bening, Tjoan Hin rasaken badannja lemes, hampir² sadja ia tida bisa terusken naek ia punja sepeda buat bawa ia pulang kerumanja.
„Ah......” kedengeran ia menggrutu kutika ia lepasken badannja di atas satu korsi males, sesampenja di ia punja ruma.
Ia punja ibu merasa heran meliat kelakuannja ia punja putra jang ada berbeda sekali dari sari², njonja Tjiam lalu samperken pada Tjoan Hin serta menanja: „Kau kenapa Hin? Kenapa dari setadian kau menarik napas pandjang pendek sadja? Apa kau sakit?”
„Tida ibu... trima kasi buat kau punja perhatian. Aku tida kenapa-napa, tjuma sadja aku merasaken lelah betul pada hari ini, kerna ada
