Seperti boeat peringetan, maka tempo ia dapet anak, lantas dinamain si Koenjit.
Entjek A-kin, ajahnja nona Koenjit ada saorang bae dan sabar, moekanja selaloe tersenjoem maka orang kampoeng banjak soeka padanja dan waroengnja banjak lakoe Beda djaoe sekali dengen bininja, jang keliwat ketoes dan kewat maka dalem itoe kampoeng ia dinamain si Njonja Djahat. Kaloe Akin tida ada diwaroeng, orang-orang kampoeng tida soeka dateng bladja, lebi soeka pergi blandja dilaen waroeng kendati ada lebi djaoe, atawa menoenggoe sampe entjek Akin dateng.
Kaloe ada orang maoe blandja, soeda masoek, liat tjoema ada njonja Djahat sadja, tentoe menanja, kemana entjek pergi. Kaloe jang menanja itoe ada orang lelaki, masi boleh djoega, djangan kena prampoean, tentoe njonja Djahat djadi marah, dia kirah itoe prampoean, dikata soekain lakinja dan segala matjem. Nanti kaloe Akin poelang, djoega didamprat lantaran tjemboeroean.
Tapi lantaran sabarnja. Akin selamanja ganda tertawa sadja dan boedjoekin bininja, djangan bikin begitoe, orang banjak nanti djadi marah, tentoe tida lagi maoe blandja, kaloe kedjadian sampe begitoe djaoe, apakah boekan ia orang boleh tjilaka?
Akin bilang, pengidoepannja dari waroeng, dan waroeng kaloe tida ada jang blandja darimana bisa dapet kaoentoengan; lantaran tida ada
