DARAH KOTOR
Satoe tjerita jang betoel kedjadian di Betawi,
ditjeritaken oleh:
TJIAN LIE GAN.
I
„Kesian! la ada saorang bae betoel, mati moeda-moeda lantaran terlaloe di rong-rong sama bininja dan terlaloe kenjang disoempain,” begitoe kedengeran orang berkata-kata.
Orang jang mati itoe bernama Asiong, toekang kaleng di Sawa Besar. la ada saorang Khe itoe tempo ia mati kira oemoer 30 taon dengen tinggalken satoe bini dan satoe anak prampoean, si Roti, kira oemoer 6 taon
Njonja Asiong ada anak kampoeng Kwitang, orang toeanja djoega ada bangsa Khe boeka waroeng di kampoeng, djoeal beras, minjak, kajoe dan laen-laen kaperloean hari-hari. Tempo masi anak-anak, njonja Asiong terkenal dengen nama nona Koenjit. Orang toeanja kasi nama begitoe, ada lantarannja, jaitoe bermoela ia dapet oentoeng dari koenjit kering, jang ia dapet beli dari oedik sampe beratoes pikoel. ia djoeal di Pintoe Ketjil dengen banjak oentoeng, dengen apa ia djadi bisa boeka waroeng di kampoeng Kwitang.
Darah Kotor
1
