Ado sabanta antaronyo
Datang Sutan Sari Alam
Ditapuaknyo bahu Bujang Piaman
"Patuah bana kawan kironyo
Iyo ka Puti Payuang Lauik
Barapo susah iko garan
Mambawo kudo sadang sakik”’
"Sakiknyo indak parah bana”
Katonyo dukun Katik Basa
"Dalam duo pakan iko
Inyo kan dapek tu bajalan”
Si Bujang indak nyo manjawek
Indak tantu apo kan disabuik
Inyo galak sengeng sajo
Hatinyo kacau bak diharu
Kapalonyo baraso ringan
Indak pandai inyo bapikia
Lah taraso tumah dek inyo
Inyo indak gilo surang
Indak digilo bayang-bayang
Jaleh tampak di mato si Payuang
Nan taruih mancaliak kapadonyo
Salamo kakaknyo mangecektu
Kakaknyo Sutan Sari Alam
Sabanta pulo antaronyo
Lah turun tampak Puti Tuo
Inyo lansuang maliek Balang Candai
Sarato mamparatikan baluik kakinyo
Sudah itu inyo basalam
Iyo jo dukun Katik Basa Tuo
Bakato inyo maso itu
"Lah payah kironyo Mamak Katik
Maubeki kudo si Upiak ko
Alun juo inyo cegak lai
Mamintak ambo pado mamak
46
