— 124 —
koe. Akoe ini kapitein Dantes, seorang baik dan berhati toeloes, maskipoen sekarang akoe tida taoe ada tertoedoeh di dalem perkara apa: ka manatah angkaoe membawa akoe ini? Bilanglah itoe padakoe! akoe berdjandji padamoe, bahoewa akoe nanti lakoeken kewadjibankoe dan trima sekalian peroentoengankoe."
Itoe soldadoe garoek-garoek kepala dan menengok pada temannja. Ini teman gerakken, kepala, seperti maoe berkata, ijang dari sebab soedah ada di tengah laoet, ija rasa tida sangkoetan apa-apa aken sahoeti pertanjaännja Dantes; maka itoe soldadoe ijang pertama lantas menengok dan berkata pada itoe orang tangkepan:
„Kaoe ini seorang Marseille dan seorang pelajaran, tapi kaoe menanja padakoe, ka mana kita-orang menoedjoe."
„Ja," sahoet Dantes: „kerna dengen soenggoeh akoe tida taoe kita-orang ini aken ka mana?"
— „Apa kaoe tida bisa mendoega apa-apa ?"
— „Tida sekali."
— „Moestahil!"
— „Soenggoeh! — Demi Allah, biarlah kaoe bilangi akoe."
— „Ada larangan!"
— „Larangan itoe tida nanti menjegahken aken kaoe bilang padakoe ini, dan sigra djoega akoe nanti dapet taoe; dengen sahoeti pertanjaänkoe, kaoe senangken hatikoe ijang tergontjang-gontjang. Akoe menanja padamoe, seperti kaoe ini ada djadi sobatkoe. Dengerlah! tida sekali akoe ada niat aken merontak atawa aken minggat; sekali poen akoe maoe, akoe poen tida nanti bisa. Kemanatah kita ini belajar?"
— „Kaloe matamoe tida tertoetoep dan kaoe soedah taoe
