— 816 —
ada kelihatan satoe bangkoe batoe dan bebrapa korsi besi ijang di taro di tempat tedoeh, itcelah soewatoe tanda, bahoewa orang dari itoe roemah besar ada ijang soeka doedoek-doedoek di tempat itoe pada waktoe ada panas, tempat itoe poen maski di waktoe tengah hari ada tedoeh dan berhawa adem.
Pada soewatoe hari di waktoe lohor, ada kelihatan di bangkoe batoe ijang ada di podjok pekarangan itoe : satoe boekoe, satoe pajoeng, satoe kerandjang ketjil tempat pendjaitan dan satoe selampe soetra ijang baroe didjait sebagian dan tida djaoeh dari bangkoe itoe di pinggir pintoe hek, ada berdiri satoe nona ijang mengintip dari renggangnja papan ka dalem itoe kebon sajoer ijang terseboet di atas ini.
Ampir di itoe waktoe djoega, itoe pintoe ketjil ijang menemboes ka kebon kelihatan terboeka dengen perlahan, dan satoe lelaki moeda ijang badannja tinggi-besar dan koewat masoek ka kebon itoe. Pakeannja lelaki ini ada sebiasanja pakean orang pakebonan, tapi ija poenja koemis djenggot dan ramboetnja ijang kelihatan ada dirawati baik sekali, tida soeroep pada pakeannja orang pakebonan. Sesoedahnja melihat koeliling dan dapet taoe tida ada orang melihat padanja, lelaki itoe lantas toetoep kombali itoe pintoe dan teroes berdjalan dengen tjepat mengamperi pada pintoe hek.
Satelah melihat ini lelaki mengamperi, itoe Nona moendoer satindak, selakoe ada merasa takoet. Tapi itoe lelaki telah dapet lihat dari renggangnja papan Nona itoe poenja pakean ijang poetih dengen pinggiran biroe; maka satelah sampe pada Itoe pintoe hek, lelaki itoe dekatken moeloetnja pada renggangnja papan, dan laloe berkata:
