— 232 —
„Kaoe sendiri siapata ?" sahoet itoe soewara dari dalem tanah.
― „Seorang toetoepan ijang tida merasa berat aken sahoeti pertanjaän kaoe."
― „Orang dari mana?"
― „Dari Frankrijk."
― „Namamoe?"
― „Edmond Dantes."
― „Pakerdjaänmoe?"
― „Orang pelajaran."
― „Soedah brapa lama kaoe ada di sini?"
― „Sedari tanggal 20 Februari 1815."
― „Kesalahanmoe?"
― „Akoe tida bersalah.",
― „Tapi ditoedoeh berboewat apa?"
― „Ditoedoeh djadi anggota dari pakoempoelan rasia, ijang bekerdja soepaja Baginda Keizer boleh balik kombali."
― „Boleh balik kombali? apa Baginda Keizer soedah tida di atas tachta?"
― „Di dalem tahon 1814 ija djato dari keradjaännja laloe ditempatken di poelo Elba. Tapi sedari kapantah kaoe ada di sini, maka tida taoe itoe perkara?"
― „Sedari tahon 1811."
Dantes merasa kaget, kerna tetangganja itoe soedah tertoetoep ampat tahon lebih lama dari padanja.
― „Djangan menggali lagi," kata poela itoe soewara di dalem tanah: „hanja bilanglah padakoe, di betoelan mana adanja lobang ijang kaoe gali."
„Rata dengen tanah dasarnja kamar ini," sahoet Dantes.
― „Dia terpedeng dengen apa ?"
